Айни пайтда  дунёнинг энг қиммат футболчиси ким? Машҳур “Transfermerk.de” нашри шу ҳақда маълумот берди.

Нашрнинг таъкидлашича, ПСЖ ҳужумчиси, Москвадан ўтган жаҳон чемпионати кашфиёти  Килиан Мбаппе 200 миллион еврога баҳоланган ҳолда рўйхатнинг бошида турибди. Иккинчи жойни  ПСЖнинг яна бир футболчиси Неймар ҳамда “Барселона” ҳужумчиси Лионель Месси банд этган. Уларнинг трансфер қиймати 180 миллион еврога тенг. Муҳаммад Салоҳ, Гарри Кейн, Антуан Гризманн, Кевин Де Брюйне, Фелипе Коутиньо, Эден Азар каби футболчилар 150 миллион евролик нарх билан улардан кейинги ўринлардан  жой олган.

Келгуси йилнинг 8-13 январь кунлари Жакартада велоспортнинг трек йўналиши бўйича Осиё чемпионати бўлиб ўтади. Ушбу нуфузли мусобақага тайёргарлик кўраётган мамлакатимиз терма жамоаси аъзолари навбатдаги йиғинга тўпландилар. Алексей Фомовский, Данил Евдокимов, Никита Стенковой, Дмитрий Сирко, Янина Кускова ва бошқа спортчилар мураббий Вадим Шаехов бошчилигида Тошкент шаҳридаги велотрек мажмуасида машғулотлар ўтказишмоқда.

Урганч шаҳрида волейбол бўйича аёллар ўртасидаги Ўзбекистон XXVI миллий чемпионатининг биринчи тур ўйинлари бўлиб ўтди. Мусобақада Тошкент вилоятининг  СКУФ, Жиззах вилоятининг ЖДПИ, Хоразм вилоятининг “Хоразм”, Наманган вилоятининг “Янгиқўрғон”, Сирдарё вилоятининг “Гулистон ВК”, Қорақалпоғистон Республикасининг НДПИ, Бухоро вилоятининг “Бухоро” ҳамда Самарқанд вилоятининг СамДУ жамоалари иштирок этишди.