Ҳиндистоннинг Нави Мумбай шаҳри соврин жамғармаси 25 000 АҚШ долларини ташкил этувчи теннис турнирига мезбонлик қилмоқда.

“Фьючерс” туркумига кирувчи мазкур мусобақада мамлакатимизнинг иккинчи ракеткаси Нигина Абдураимова ҳам қатнашяпти.

У яккалик баҳслар асосий тўрининг илк учрашувида америкалик Анастасия Нефедовага қарши кортга чиқиб, рақибасини  6:1, 6:2 ҳисобида енгди. Энди Нигина чорак финал чиптаси учун грузиялик Марьям Болквадзега қарши баҳс олиб боради. Болквадзе бу турда украиналик Валерия Страховани мағлуб этди.

Бугун Россиянинг Қозон шаҳрида профессионал бокс бўйича халқаро мусобақа бўлиб ўтади. Унда мамлакатимиз шарафини оғир вазн тоифасида Отабек Иброҳимов ҳимоя қилади. У  қозоғистонлик Ваҳид Акчуринга қарши рингга кўтарилади.

Боксчимиз жорий йилнинг май ва сентябрь ойларида проф рингда ўтказган икки жангида ҳам мағлубиятга учраган. Унга учинчи жангини ғалаба билан якунлашини тилаб қоламиз. Шуни  унутмаслик лозимки, унинг рақиби Ваҳид ўзининг профессионал рингдаги бирингчи жангини ўтказади.

Покистон пойтахти Исломобод шаҳрида соврин жамғармаси 15 000 АҚШ долларини ташкил қилувчи теннис турнирининг асосий тўр баҳслари бошланди.

“Фьючерс” туркумига кирувчи ушбу мусобақада ҳамюртларимиз ҳам қатнашяпти. Амал Султонбеков саралашнинг иккинчи даврасида биринчи рақам остида сараланган сингапурлик рақибига ютқазиб қўйди. Бошқа бир теннисчимиз Саидаъло Саидкаримов эса иштирокини асосий тўр баҳсларидан бошлайди.